1-yanvargacha eksportchilar muddati oʻtgan debitorlik qarzini penyasiz yopishi mumkin: PF-176-son farmon

Prezidentning 2026-yil 27-avgustdagi PF-176-son Farmoni bilan tashqi savdo operatsiyalari boʻyicha muddati oʻtgan debitorlik qarzini qisqartirish boʻyicha bir martalik aksiya eʼlon qilindi. U 2027-yil 1-yanvargacha davom etadi.

Mexanizm: korxona oʻz mablagʻlari hisobidan 2026-yil 28-avgustgacha yuzaga kelgan va «E-kontrakt» tizimida muddati oʻtgan deb qayd etilgan eksport shartnomalari boʻyicha qarzni soʻndiradi. Valyuta bank kassasi orqali kiritiladi, shundan soʻng tizimdagi muddati oʻtgan summa avtomatik kamayadi, hisoblangan penyalar esa hisobdan chiqariladi.

Aksiya davlat ulushi 50% va undan ortiq boʻlgan korxonalarga taalluqli emas.

2027-yil 1-yanvardan doimiy norma ham ishlaydi: korxona qarzni undirish boʻyicha vijdonan chora koʻrganini isbotlasa, qarzning 50% dan koʻpini qaytargan boʻlsa yoki xalqaro sanksiyalar tufayli mablagʻni repatriatsiya qila olmasa, valyuta tushumini qaytarmaganlik uchun jarima ikki barobar kamaytirilishi mumkin.

Amalda bu nimani anglatadi: kompaniyangizda muddati oʻtgan eksport debitorkasi boʻlsa, uni penyasiz yopish uchun toʻrt oy bor — yangi yildan keyin bunday imkoniyat boʻlmaydi.

Foto: Trougnouf, Wikimedia Commons (CC BY 4.0)